كل سنه وانتوا طيبين

اولا كل سنه وانت طيبين وعام سعيد عليكم

ايه ده انت بتكلمى حد ده المدونه بقت مهويه يابنتى

اه منا عارفه بس يعنى لازم تفكرينى

ده بالظبط الحوار الى دار مع نفسى وانا بكتب البوست ده

حسيت انى مش عارفه انا بكتب لمين ولا هاكتب ايه بس كل الى اعرفه انى محتاجه اكتب 

محتاجه اخرج الى جوايا وملقتش مكان تانى اخرجه فيه الا هنا فى مدونتى 

اصلها الوحيده الى مش هتشتكى ولا تمل من كلامى 

طيب ننتقل للمفيد ايه بقى الى كنت عايزه اتكلم عنه 

اه افتكرت كنت بفكر ليه احنا كده مع ان المفروض منباقش كده ومكناش كده زمان

حد فاهم حاجه

اه نسيت مفيش حد غيرى هنا طيب هافهمك يانفسى كلامى

المفروض ان احنا مسلمين والمسلمين زمان كانوا عظماء بس احنا مبقناش عظماء 

ليه وازاى وصلنا لكده انا مش لاقيه تفسير غير ان احنا مبقاناش مسلمين من جوه

اصل الاسلام عظيم والمسلمين عظماء وهيفضلوا ومادام احنا وصلنا لكده يبقى احنا مش مسلمين

انا مش فاهمه ليه الانسان يتخلى عن حاجه هترفعه لفوق وتعلى اسمه 

ليه نرضى ان احنا نكون درجه تالته ورابعه مع ان مكانا فوق اعلى من الدرجه الاولى

لو بس نفكر ونبدأ من جديد

لو بجد نبقى مسلمين من جوه مش بس اسم اكيد هنكون اعظم امه

بس انا بقول الكلام لمين معلش نسيت

اصل انا هنا لوحدى

نعيب زماننا والعيب فينا

وما لزماننا عيب سوانا

ونهجو ذا الزمان بغير ذنب

ولو نطق لنا الزمان لهجانا 

كل سنه وانتم طيبين

 دايما بتوحشنى الكتابه هنا وانا اسفه انى مش بقدر اتابع المدونات بس هى الظروف الى ماليش دخل فيها

كنت قاعده بفكر فى الناس الى قابلتهم وعرفتهم فى حياتى فاكتشفت انى قابلت نوعين 

او يمكن انا لخصتهم لنوعين بس

النوع الاول يخلى الدنيا فى عنيك ضيقه 

بيبعدك عن النجاح كل ما يلاقيك قربت منه

ويبعدك عن الطريق الصح لو لقاك ماشى فيه

انا مش هتكلم عن النوع ده كتير لانكم اغلبكم عارفينه

النوع التانى بقى النقيض تماما

نوع بيسمو بيك بافكاره 

بتحس معاه انك بتعلى وتعلى لفوق بعيد عن احقاد الدنيا وهمومها

افكارهم بتنورلك طريقك للحق

معاهم بتحس انك نضيف من جوه وقلبك بقى ابيض

السؤال بقى دلوقتى

انت مين فيهم ؟؟

انت انهى نوع ؟؟

  

عودنا

السلام عليكم ورحمه الله وبركاته

والله وحشتنى الكتابه الحمد لله الذى هدانا لهذا وما كنا لنهتدى لولا ان هدانا الله

الى خلانى اكتب النهارده هيه اوضاع البلد المقلوب حالها

بدءا بالثانويه العامه اقصد المجزاره العامه مرورا بقانون الضرائب الجديد

وانهيها بقانون السيارات الجديد

لازم كل عربيه حتى تاخذ رخصه ان يكون بها شنطه اساعافات اوليه

بس هيه للاسف مش اسعافات اوليه بس هيه تقريبا تضم مستشفى بحالها

انا شايفه ان ده تهريج

انا مع ان لازم يكون فيه ادوات اسعافات اوليه بس مش بالشكل الى هما طالبينه

ده حتى استعمال بعضهم محتاج الى تدريب

وفى النهايه لما يحدث شئ لا قدر الله الواحد بيبقى غايب عن الوعى

يعنى مش هيقدر بقى يسعف نفسه

طبعا القانون ده معملول خصوصا لان عربات الاسعاف غير كافيه

وغير كده كتير منها غير مجهزه التجهيز الكامل

طبعا هما عايزين يعملوا كده علشان محدش يطلب عربيه اسعاف تانى 

ما هو خلاص بقى فيه اسعاف محمول

طبعا ده وجهه نظرى فى الموضوع قد يتفق البعض معى وقد يختلف

وطبعا يهمنى اعرف رايكم فى الموضوع

فضفضه

السلام عليكم ورحمه الله وبركاته

بيتهيألى انى من ساعه ما انشأت المدونه مكتبتش عن نفسى او عن مواقفى مع الحياه

على الرغم من ان ده كان السبب الرئيسى لانشاء المدونه ديه

ده يمكن لانى بخاف اكتب عن نفسى واطلع اسرارى الى مخبياها من سنين

والى بيخوفنى اكتر ان فيه ناس كتيره عارفانى على الواقع

المشكله دلوقتى مش فانى اكلم ولالا

المشكله هل ياترى لو اتكلمت هستفيد حاجه؟؟

ياترى هرتاح نفسيا من العبء الى شيلاه من سنين؟؟

وياترى هلاقى حد يسمعنى ؟؟

انا عارفه ان فيه كتير من الى هيقروا البوست ده هيقول اه الى كاتباه ده

بس بجد لو حد كاتم فى نفسه شئ وعايز يطلعه ومش عارف هيقدر يعرف انا حاسه بايه

وعلى العموم فى الاخر متخدوش فى بالك انا بس بكلم نفسى

وتسير الحياه ويبقى الوضع كما هو عليه

حبيبتى غزه

طبعا كلنا متأثرين من الى بيحصل لاخواننا فى غزه

بس يمكن اكتر حاجه مضيقانى ومخليانى احس بالضعف انى مش قادره اعمله اى حاجه غير الدعاء

انا حاسه ان هيجيلى حاجه من كتر ما بكتم فى نفسى

ياريتنى كنت ولد وفلسطينى كنت بجد قدرت اعمل حاجه

بس الحمد لله على كل شئ

انا كتبت بعض ابيات الشعر عن غزه

طبعا هو مش شعر اوى بس هو الحاجه الوحيده الى قدرت افرغ شويه من الى حاساه بيه

اليكم هذه الابيات




حبيبتى يا حبيسه الجدارن

تبكيك العين

ويجزع القلب لهذا الامتهان

كلاب سعرت وشحذت الاسنان

ليلتهموكى بكل غصب وعدوان

والناس حولك تقف نيام

تركوكى فى يد الطغيان

لا استنكار ولا حتى كلام

كأنهم راضون عن العدوان

اطفال تقتل فى كل مكان

ونساء تبكى وتحلم بالامان

ولازالت الناس تقف نيام

وكأنهم يعيشون بعيد

فى زمان غير الزمان

فلا نامت عيون الاجبان


حبيبتى يا حبيسه الجدارات

كان فى عونك المنان

لغتنا الجميله

ومدعشر بالقحطلين تحشرمت
شرابتاه فخر كالقر بعصلى

ده بيت شعر من قصيده وراها حكايه كان نفسى بجد اكتبها بالتشكيل بس للاسف معرفش
المهم نحكى القصه بقى
كان فيه ملك بيحب اوى يسمع الشعراء وكان ليه قدره انه يحفظ القصيده بعد ما يسمعها مره واحده
وكان وزيره ليه المقدره انه يحفظ اى قصيده بعد ما يسمعها مرتين

وكان عنده خادمه كانت لديها القدره على حفظ اى قصيده بعد سماعها ثلاث مرات
المهم اتفق الملك مع وزيره وخادمته انهم يعملوا مسابقه للشعراء والى يدخل فيها لازم يقدم قصيده
جديده ولم تسمع من قبل والا هتقع عليه عقوبه (مش فاكره هى ايه بالظبط ) وطبعا كل الشعراء تنافسوا لان الجائزه كانت قيمه (برضه مش فاكره هى ايه) المهم كان كل يوم يروح شاعر علشان يقول قصيدته
الجديده علشان يكسب الجائزه فكان اول ما يقولها قدام الملك يقول لا ديه قديمه انا سمعتها قبل كده
ويؤكدله ذلك بانها يقولها وبعدين يجيب وزيره فيقولها وبعدين يجيب خادمته الى بتحفظ من تالت مره
فتقولها وبكده يكون الملك خدع الشاعر وكمان وقع عليه عقوبه
المهم بقى فى شاعر ذكر اخد باله من الحكايه ديه فقرر انه يعمل قصيده صعبه الالفاظ مستغلا بذلك
كنوز لغتنا العربيه علشان يصعب على الملك حفظها
وفعلا قال القصيده الى انا كتبت منها البيت الى فوق ده وقالها للملك وقاله هل سمعت به من قبل ؟؟
طبعا قاله لا لان الملك مقدرش يحفظها ونادى على وزيره فقله لا مسمعتهاش من قبل (لانه محتاج يسمعها
مرتين علشان يحفظها ) ونادى على خادمته وبرضه مقدرتش تحفظها فقالت لا اسمع بها من قبل
المهم طبعا الشاعر اخد المكافأه وهو فعلا يستحقها

طيب انا بقول الحكايه ديه ليه
انا بس عايزه اذكركم قد ايه لغتنا العربيه ديه قيمه وقد ايه هى ماليانه كنوز وللاسف احنا
مضيعينها ومش مدينها حقه واصبح كلمنا كله عمى وكمان دخل عليه بعض المصطلحات الاجنبيه ان مكنش
كلها
كانوا زمان علشان عارفين اللغه صح كان سهل عليه القاء الشعر وكان سهل عليه قراءه القراءن صح
وفهم معانيه واحنا دلوقتى يأما بتلاقينا كاتبين الشعر بالعامى (وده انتشر اوى )يأما مش قادرين
نفهم بعض معانى القراءن
انا شايفه بجد ان احنا محتاجين نرجع تانى نتعلم اللغه العربيه ونرجع نحس بقيمتها
وطبعا انا باعتذر انى كاتبه الموضوع بالعاميه بس للاسف انا فعلا محتاجه اقوى لغتى العربيه
لغه القراءن

خبر بس اخير بجد اسعدنى
الخبر بيقول ان وزير الاستثمار الدكتور محمود محيي الدين فرض غرامه ماليه قدرها عشره جنيهات
على من يخطئ املائيا فى اللغه العربيه من موظفى وزارته
طبعا لغتنا العربيه تستاهل اكتر من عشره جنيه
بس بجد انا بحييه على القرار ده وعقبال ما يطبق فى وزاره التربيه والتعليم

اخر ما وصلنا له..ولا عزاء

قضيه هامه جدا لازم كلنا نتناقش فيها هحكى الموقف وهاعلق وهاستنى تعليقكم عليه

مواطن مصرى مسلم ساكن فى عماره صاحب العماره عايز يخرجه من الشقه

انا مش عارفه ليه بالظبط بس بيتهيألى جايله فيها اكتر يعنى هيه حاجه ليها علاقه بالفلوس بس مش موضوعنا

المهم صاحبنا المواطن رفض طبعا يسيب شقته وطبعا صاحب العماره اضايق

قال يعمل ايه بقى صاحب العماره هو ليه اصحاب فى الامن ام كلمهم يخلصوا هما الموضوع

طبعا انا مش عارفه التفاصيل اوى المهم يعنى فى الاخر صاحبنا راح القسم واتبهدل هناك

وخرج منه عنده رشح دموى فى اذنه وانفصال عظام الاذن

وهو مسكتش هناك قعد يهددهم هرفع عليكم قضيه وهاخد حقى

فقرروا مكافأته بأنهم اخدوا مراته فى البوكس علشان يثيروا فيه النخوه ويكسروا نفسه

المهم صاحبنا بعت شكوى لجميع الكراسى اقصد للى قاعدين على الكراسى فى المناصب الهامه بالتدريج حتى وصل انه بعت

لرئيس الجمهوريه السيد حسنى مبارك طبعا محدش رد عليه

المهم فى الاخر بعد ما نفذ صبر الراجل راح فين ؟؟

راح يستنجد بالسفاره الاسرائيليه !! فى مصر علشان يجيبوله حقه

وانتهت القصه

الراجل ده كان مستضيفونه فى حلقه فى برنامج بس علشان يسئلوه انت ازاى تروح تستنجد بالسفاره الاسرائيليه

مسئلوهوش ايه الى وصله لكده

المهم احنا عايزين نناقش الموقف من جميع اتجاهاته

الاول هو صح انه يستنجد بالسفاره الاسرائيليه ؟؟

طبعا لا مهما حصل لانه عدو ده اولا

ثانيا لانهم اصلا مش هيفيدوه بحاجه لانه ميهمهمش فى حاجه

كل الى بيروحلهم الى بيهمه فيه بس هى ينفع يشتغل كجاسوس ولالا

وازاى نقدر نستفيد منه مش ازاى نحلله مشاكله

ازاى اروح استنجد بواحد بيكرهنى وبيكره دينى!؟؟

الاتجاه التانى قبل ما نقوله انت غلطان مش برضه الدوله غلطت فى حقه ؟؟

مش برضه هو مظلوم قبل ما يكون غلطان؟؟

يعنى هو ايه الى وصله لكده

الانسان ده لو شفتوه و هو بيتكلم بجد هتعرفوا يعنى ايه واحد حاسس بالظلم ومش قادر يعمل حاجه

هو عمل كل الى يقدر عليه بعت لكل المناصب حتى رئيس الجمهوريه

ومحدش رجعله حقه

عايش فى حاله غضب جامده وصلته للانفجار

ممكن يكون فاكر انه لما يروح السفاره الاسرائيليه هيساعدوه يجيب حقه ويساعدوه ينتقم من الى ظلموه

ملجأش ليهم الا بعد ما اترجى كل مسئول مصرى يقدر يجيبله حقه

احساس بشع لما تحس انك مضطهد انك خلاص مش قادر حتى تسترجع كرامتك الى اتهانت

سؤال اخير

الى متى ستظل اعتداءات رجال الامن على الشعب المصرى بلا حسيب او رقيب؟؟

مش هما برضه المفروض يحمونا والاتقلبت الايه؟؟

هى السلطات العليا متبوقفهمش عند حدهم ليه؟؟

حسبنا الله ونعم الوكيل فى كل ظالم معتدى